stik foar stik ik
in mins hat sân gesichten
in dichter ken se út ’e holle
hij hie leaver íen ha wollen
want se bringe him te praat
de skaden fan syn bloed
ik: stik foar stik
oait fregen se in dichter:
fertel ús wa’sto bist
‘ik bin eppie dam
mar fierder giet it goed’
hjir hinget er dan hjoed
dy’t fan ’e prins tefolle kwea wist
troch god it iepen fjild yn stjoerd
do: adam bisto
in bern socht beskûl yn ’e sleat
beduts syn gesicht as laai sa blau
grien fan skamte om neat
en gie ûnder it mom fan genede
de lange wei fan beton
in man hie sân gesichten
in bakkes, in antlit, in troany
in oanblik, in harsens
in kop fan mahoany, in glim
en allegear ferburgen se him
do: sis it no
in mins krych sân gesichten
it effene, it skuldige
it opstannige, it ûngeduldige
ferheven en ynnimmend
it groeiend besef fan dy glim
se foarmen en feroaren him
no freegje wij in dichter:
fertel ús wa’sto bist
‘ik bin dy en dy
7-dûbel myn portret
en freegje fierder net’
Mear fan Eppie Dam
De ingel Gabrielle en oersettingen fan Joni Mitchell |
Autopetsjend jonkje en Op it wettersportfestival |
Eucalyptus |
Selsportret neffens in foto en Bloeiende eucalyptus bij de hjerst |
Hommaazje oan it lansearplak en De fiskers op South Head |
Wurkgelegenheid foar de klasseleaze kastes en De takomst |
De pûltsjepreek |
De wandied en In dagewoane reinbôge |
Troch de houtseagersdoarpen |
Houthakker yn ’e middei Oersetting fan Noonday Axeman fan Les Murray |