Wolkom yn Fryslan!
Wolkom yn Wommels
Abe de Vries - Fers2 2.4, 24 febrewaris 2016
Noch leit de oprole fust fan ’e buorren
driigjend tsjin harren sûnder hûs en hiem.
Mar yn it moark skûlet de minske en aanst sil
de iepen hân der wol wêze foar de golle groet.
De buorren glimket blank yn de winterrein en
-Gefaar! roppe noch de boargers tsjin harren
braaf masterke, dat ta twahûndert telle kin
en hûndert mear ek folle fynt foar ’t gat.
Swier skonkjend, elk in sigaar achter ’t ear,
tôgje boeren in blûn petret troch de strjitte
fan de heilbringer dy’t de jonge dochters
hoedzje sil foar de frjemdlingen.
Oars is ûnheil. En net te ferstean. En geil.
Men kin it mar witte fan de leagenbank,
dêr’t altyd de skriemers sitte en dy’t fout
nei de oarloch swetse oer de nije auto.
Mar yn ’e keamers sprekke âlde spreuken wiis
op tsjin it kwea en aanst feit in gedicht
immen de stront út it each: dan blinkt der
Frysk en frij in wolkom yn Wommels.
(frij nei Jan W.)
Wolwezen yn Warkum
Friduwih Riemersma - Fers2 2.4, 24 febrewaris 2016
Warkum - De suvelkoöperaasje
De Goede Verwachting yn Warkum
betellet syn boeren in molkpriis
fan 87,12 sint de kilogram: dat is
de heechste priis yn Fryslân ea.
De priis fan 87,12 leit boppe dy fan
Noard-Nederlân, wol 2,5 sint.
Ferline jier betelle De Goede
Verwachting 87,50 sint de kilo út.
Foar de neibetelling is beskikber
9,66 sint foar ien kilogram molke
(7,83 sint ferline jier). De ôfskriuwing is
1,95 sint (1,90 sint); oan ’t eigen fermogen
wurdt tafoege 1,29 sint (wie 0,81 sint).
De feehâlders fierden 278,6 miljoen
kilogram molke oan. Se kochten
14,8 miljoen kilo by. It fetgehalte wie
4,458 prosint, it aaiwytgehalte 3,448.
Fan dy molke makken se 25.200 tûzen
kilo tsiis (25.900 ton), dêr’t 2500 ton fan
Westlite wie. Har waaipoeierproduksje
helle de 11.500 ton (10.800), dy fan
molkpoeier goed 2000 ton (1500).
Foar de nije soarte Trenta bestiet in protte
niget; it fabryk yn Heech dêr’t dizze tsiis
fan plantaardige fetten makke wurdt
dêr arbeidzje se hiel geregeld oer.
Nei berjocht LC 12 april 1990
Weemoed yn Warns
Friduwih Riemersma - Fers2 2.4, 24 febrewaris 2016
Wee Warns, no’t yn ús koartwjokke grûn
Us eigen skries syn ûndergong fûn.
Us wjokke wurd fan frijdom is dea.
Tûzen klepelmeanders blonken yn de sinne,
Gâns oranjekoeke bargen wy trochhinne,/p>
Wy wiene master oer lân en wetter
Wy balten it Tsjoch op! hieltyd letter.
Mar, al wit nimmen noch wat Redbad die,
Is de Fryske Feestkalinder net mear wat er wie—
Bewegers komme, om troch ús agitprop te swalkjen
En Eko-toeristen, om ús kij te stalkjen.
Mear fan Abe de Vries
Tsjinwynkronyk 2018 #1 It earste fearnsjier fan it kulturele haadstêdbarren sit derop! Fers2 hat mar in bytsje lêst fan hân fan dat fearnspart. Mar LF2018 nammerstemear |
Ut Mienskar: Sonnetten Doarp, dij binn’ swierrichheden brocht / yn romtes dêr’t wy stikten fan it gnizen. |
Ut Mienskar: Sonnetten Men soe in ekspresjonist, in fauvist wêze wolle, / wurkjend yn syn earste blauwe perioade, / mei in toets, op foarbyld fan âlden stuolle |
Ferskriftliking en ferboargerliking fan Fryske literatuer: It wurk fan Cor Wielsma (1845-1922) |
Yn ’e iensumens fan it Koarnjumer Aldlân Hy siet beknypt tusken ‘klerikaal en liberaal, tusken sosjalist en populist’. Der is lykwols reden om oan te nimmen dat der noch wat oars wie … |
‘Fryslâns fee is hearefee, Fryslâns grûn is hearegrûn’ It is even nei healwei njoggenen, de kâlde moandeitejûn fan 18 November 1901, en hy hat tefolle dronken. |
Folksskriuwerij en lokale elites yn de Lytse Bouhoeke De Lytse Bouhoeke is yn it midden fan de njoggentjinde ieu in lytse wrâld. Drok ûnderling ferkear fan boeren, skoalmasters, dûmnys, smidden … |
Neo-folk as krityk op it kapitalisme Folksferhalen binne, om binnentroch te stekken, sterke stikken dy’t de generaasjes bylâns trochferteld wurde op jierdeisfeestjes. |
‘Freonen fan âlds, farwol!’ ‘Ofskie’ is, as ik myn sin sis, ien fan ’e kaaifersen fan Piter Jelles Troelstra. |
Indian summer yn in sjaletsy op ’e Twizelerheide Foar it rút Crazy, it hynder sûnder namme, / tjirget tsjin it spantou foar wat gers. |